રાધનપુરમાં ફૂડ વિભાગ અને નગરપાલિકાની સંયુક્ત તપાસમાં ચોંકાવનારા ખુલાસા
પાણીપુરીની લારીઓમાંથી સડેલા બટાકા, રંગયુક્ત પાણી અને સરકારી પુરવઠાનું મીઠું-ચણા મળી આવ્યાનો દાવો
મીડિયાના અહેવાલ બાદ તંત્ર હરકતમાં આવ્યું ; મીઠાઈની દુકાનોમાં કપડાં ધોવાના સોડા મળી આવ્યાની વિગતો સામે આવતાં ખાદ્ય સુરક્ષા સામે ગંભીર સવાલો
More Read
કેપિટલ મેસેજ
Capital message
30, October, 2026
More Read
રાધનપુરમાં તાજેતરમાં ભેળ-પાણીપુરી સહિતની ખાદ્ય વસ્તુઓ ખાધા બાદ કેટલાક લોકોને તબિયત લથડવાની ઘટના સામે આવ્યા બાદ આખરે ફૂડ વિભાગ અને નગરપાલિકાનું તંત્ર હરકતમાં આવ્યું છે. આજે બંને વિભાગ દ્વારા શહેરમાં વિવિધ સ્થળોએ સંયુક્ત તપાસ હાથ ધરવામાં આવી હતી. મીડિયા અહેવાલો બાદ હાથ ધરાયેલી આ તપાસ દરમિયાન પાણીપુરીની લારીઓ, પકોડીના ઠેકાણાં અને મીઠાઈની દુકાનોમાં ખાદ્ય પદાર્થોની ગુણવત્તા તથા સ્વચ્છતાને લઈને ચોંકાવનારી વિગતો સામે આવી હોવાની માહિતી મળી રહી છે.
તપાસ દરમિયાન અનેક પાણીપુરીની લારીઓમાં સડેલા બટાકા મળી આવ્યા હોવાનું જાણવા મળ્યું છે. પાણીપુરીમાં વપરાતા પાણીમાં રંગ ઉમેરવા માટેના પદાર્થો પણ મળી આવ્યા હોવાની વિગતો સામે આવી છે. બીજી તરફ, કેટલીક મીઠાઈની દુકાનોમાં કપડાં ધોવામાં ઉપયોગમાં લેવાતા સોડા મળી આવ્યા હોવાની માહિતી ચર્ચામાં આવી છે. ખાદ્ય પદાર્થોની ગુણવત્તા અને નાગરિકોના આરોગ્ય સામે ગંભીર પ્રશ્નો ઊભા થાય તેમ છે.
ગરીબોના હિસ્સાના અનાજનો ઉપયોગ ક્યાં થઈ રહ્યો છે?
સંયુક્ત તપાસ દરમિયાન પકોડી બનાવતા કેટલાક સ્થળોએ સરકારી પુરવઠા વિભાગ સાથે સંકળાયેલું મીઠું અને ચણા મળી આવ્યા હોવાનો દાવો પણ સામે આવ્યો છે. આ મીઠું અને ચણા ગરીબ પરિવારોને મળતા જાહેર વિતરણ વ્યવસ્થાના જથ્થામાંથી આવ્યા છે કે કેમ, તે તપાસનો વિષય બન્યો છે. પકોડીના વેપારીઓને પૂછપરછ કરતાં સસ્તા અનાજની દુકાનદારો દ્વારા માલ આપવામાં આવતો હોવાની વાત સામે આવી હોવાનું જાણવા મળ્યું છે. જો સરકારી જથ્થાનો ગેરકાયદે વેપારી ઉપયોગ થતો હોવાનું સાબિત થાય તો જવાબદારો સામે કડક કાર્યવાહી થવી જોઈએ.
તપાસની જાણ થતાં કેટલીક દુકાનો બંધ?
More Read
શહેરમાં તપાસ શરૂ થતાં જ કેટલાક વેપારીઓએ પોતાની દુકાનો બંધ કરી દીધી હોવાની અને સ્થળ પરથી જતા રહ્યા હોવાની પણ ચર્ચા છે. જોકે, દુકાનો બંધ કરવા પાછળનું ચોક્કસ કારણ સત્તાવાર રીતે સ્પષ્ટ થવું જરૂરી છે. તંત્ર દ્વારા આવા સ્થળોની ઓળખ કરી ફરીથી તપાસ કરવામાં આવે તો ખાદ્ય સુરક્ષાના નિયમોનું પાલન થાય છે કે નહીં તે જાણી શકાય.
દિવાળીના તહેવારમાં નાગરિકોના આરોગ્ય સાથે ચેડાં તો નથી ને?
દિવાળીના તહેવારો દરમિયાન મીઠાઈ, ફરસાણ, પકોડી અને પાણીપુરી સહિતની ખાદ્ય વસ્તુઓની માંગ વધતી હોય છે. આવા સમયે ખાદ્ય પદાર્થોમાં વપરાતી સામગ્રીની ગુણવત્તા, સ્વચ્છતા અને સંગ્રહની યોગ્ય વ્યવસ્થા સુનિશ્ચિત કરવી અત્યંત જરૂરી છે. રાધનપુરમાં હાથ ધરાયેલી તપાસે ખાદ્ય સુરક્ષા વ્યવસ્થાની કામગીરી સામે અનેક સવાલો ઊભા કર્યા છે.
હવે સૌથી મોટો સવાલ એ છે કે આજની તપાસ માત્ર તહેવારો પૂરતી મર્યાદિત રહેશે કે પછી નિયમિત અને સતત ચેકિંગ હાથ ધરાશે? તપાસમાં સામે આવેલી બાબતોના નમૂનાઓનું પરીક્ષણ કરાશે કે નહીં? સરકારી પુરવઠાના જથ્થાના સ્ત્રોતની તપાસ થશે કે નહીં? તેમજ નિયમોનો ભંગ કરનાર વેપારીઓ સામે દંડ, લાઇસન્સ સંબંધિત કાર્યવાહી કે અન્ય કાયદેસરની કાર્યવાહી હાથ ધરાશે કે કેમ?
રાધનપુરના નાગરિકોને સુરક્ષિત અને ગુણવત્તાયુક્ત ખાદ્ય વસ્તુઓ મળે તે માટે ફૂડ વિભાગ અને નગરપાલિકાએ માત્ર તપાસ પૂરતી નહીં, પરંતુ તપાસના પરિણામો જાહેર કરીને જવાબદારો સામે નિયમસર કાર્યવાહી કરવાની જરૂર છે. તહેવારોની ભીડ વચ્ચે ખાદ્ય સુરક્ષાના નિયમોનું ઉલ્લંઘન થતું હોય તો તેને કોઈપણ સંજોગોમાં હળવાશથી લઈ શકાય નહીં.
રિપોર્ટ. અનિલ રામાનુજ, રાધનપુર
