ડભોઇમાં ઠેર-ઠેર ગંદકી જોઈ મુખ્યમંત્રી ભૂપેન્દ્ર પટેલ લાલઘૂમ: કાફલો રોકી સ્થળ મુલાકાત લીધી, RCM સહિત ઉચ્ચ અધિકારીઓનો લીધો ઉધડો
કેપિટલ મેસેજ
Capital message
નર્મદા ડેમ ખાતેનો કાર્યક્રમ પૂર્ણ કરીને પરત ફરી રહેલા મુખ્યમંત્રી ભૂપેન્દ્ર પટેલનો કાફલો ડભોઇ પાસેથી પસાર થઈ રહ્યો હતો ત્યારે મુખ્ય માર્ગો પર ફેલાયેલી ભયંકર ગંદકી જોઈ મુખ્યમંત્રી અચાનક રોકાઈ ગયા હતા. ઐતિહાસિક દર્ભાવતી નગરી (ડભોઇ) હાલ જાણે ગંદકીથી ખદબદતું શહેર બની ગયું હોય તેવી સ્થિતિ નજરે પડતાં મુખ્યમંત્રીએ ભારે નારાજગી વ્યક્ત કરી હતી અને જવાબદાર અધિકારીઓ સામે કડક વલણ અપનાવ્યું હતું
More Read
મુખ્યમંત્રીએ તાત્કાલિક રિજનલ કમિશનર ઓફ મ્યુનિસિપાલિટીઝ (RCM) સહિત વહીવટી તંત્રને જાણ કરતાં ઉચ્ચ અધિકારીઓ ઘટનાસ્થળે દોડી આવ્યા હતા. મુખ્યમંત્રીએ સ્ટેચ્યુ ઓફ યુનિટી મુખ્ય માર્ગ તેમજ ડભોઇના નાદોદી ભાગોળ સ્થિત દશામાના મંદિર પાસેના વિસ્તારની જાતે સ્થળ મુલાકાત લીધી હતી. મુખ્ય માર્ગો અને રહેણાંક વિસ્તારોમાં કચરાના ઢગલા જોઈ મુખ્યમંત્રીએ RCM તેમજ નગરપાલિકાના તમામ ખાતાના ઉચ્ચ અધિકારીઓનો ઉધડો લીધો હતો અને જાહેરમાં સ્વચ્છતાના પાઠ ભણાવ્યા હતા ડભોઇ નગરમાં જ્યાં જુઓ ત્યાં કચરાના ઢગ અને ઉભરાતી ગટરોને કારણે સ્થાનિક નાગરિકો છેલ્લા ઘણા સમયથી ત્રસ્ત હતા અને તંત્ર સામે ભારે રોષ જોવા મળી રહ્યો હતો. હવે જ્યારે રાજ્યના મુખ્યમંત્રીએ પોતે ગંદકીની ગંભીર નોંધ લઈને અધિકારીઓને આડે હાથ લીધા છે, ત્યારે ડભોઇ નગરપાલિકાનું નિંભર તંત્ર સફાળું જાગશે કે કેમ અને શહેર ખરેખર સ્વચ્છ બનશે કે નહીં તે જોવું રહ્યું.
રિપોર્ટ :- ફઝલ રઝાક ખત્રી, ડભોઈ
