સાંતલપુર : લોદરા-2 આંગણવાડી ખાતે આંગણ ઉત્સવની ઉજવણી
બાળ તંદુરસ્તી હરિફાઈ યોજાઈ, ભૂલકાઓને ઇનામ અને કિટનું વિતરણ કરાયું
કેપિટલ મેસેજ
Capital message
પાટણ જિલ્લાના સાંતલપુર તાલુકાના લોદરા ગામે ICDS વિભાગ અંતર્ગત લોદરા-2 આંગણવાડી કેન્દ્ર ખાતે “આંગણ ઉત્સવ” કાર્યક્રમની ઉજવણી કરવામાં આવી હતી. કાર્યક્રમમાં અનુસૂચિત જાતિ મોરચા સાંતલપુર તાલુકાના મંત્રી શંકરભાઈ પરમાર તથા જિલ્લા કારોબારી સભ્ય અને રાધનપુર તાલુકા કિસાન મોરચાના પ્રભારી વિક્રમભાઈ ઠાકોરની ઉપસ્થિતિ રહી હતી.
આ પ્રસંગે પ્રાથમિક શાળાના આચાર્ય પ્રકાશભાઈ ચૌધરી સહિત ગ્રામજનો, આંગણવાડી કાર્યકર બહેનો, તેડાગર બહેનો, કિશોરીઓ, સગર્ભા માતાઓ, ધાત્રી માતાઓ તથા મોટી સંખ્યામાં લાભાર્થીઓ ઉપસ્થિત રહ્યા હતા. કાર્યક્રમ દરમિયાન આંગણવાડી કેન્દ્રની કામગીરી, બાળકોને મળતી પોષણલક્ષી સેવાઓ તથા સરકારની બાળ વિકાસલક્ષી યોજનાઓ અંગે માર્ગદર્શન અને સમીક્ષા કરવામાં આવી હતી.
આંગણવાડીના નાના ભૂલકાઓ માટે બાળ તંદુરસ્તી હરિફાઈનું આયોજન કરવામાં આવ્યું હતું. હરિફાઈમાં ભાગ લેનાર બાળકોને પ્રોત્સાહિત કરવા ઇનામ તથા કિટનું વિતરણ કરવામાં આવ્યું હતું. તેમજ આંગણવાડી કાર્યકર બહેન અને તેડાગર બહેનને પ્રમાણપત્ર આપી પ્રોત્સાહિત કરવામાં આવ્યા હતા.
આંગણવાડી કેન્દ્ર મારફતે મળતી વિવિધ સરકારી યોજનાઓ અને સેવાઓનો લાભ ગ્રામજનો તથા લાભાર્થીઓને મળી રહે તે અંગે માહિતી આપવામાં આવી હતી. કાર્યક્રમના અંતે સરકાર દ્વારા બાળ વિકાસ અને પોષણ માટે અમલમાં મુકાયેલી યોજનાઓનો લાભ મળી રહ્યો હોવાનું જણાવી ગ્રામજનોએ સરકારનો આભાર વ્યક્ત કર્યો હતો.
રિપોર્ટ. અનિલ રામાનુજ પાટણ
