સિદ્ધપુર તાલુકામાં ગર્ભાશયના મુખના કેન્સરથી રક્ષણ માટે એચ.પી.વી રસીકરણ અભિયાનનો પ્રારંભ.
સિદ્ધપુર તાલુકામાં 1608 કિશોરીઓને મળશે રક્ષણ: પ્રથમ દિવસે 150 કિશોરીઓને અપાઈ રસી..
કેપિટલ મેસેજ, ન્યુઝ
તાલુકા હેલ્થ કચેરી સિદ્ધપુર દ્વારા ગર્ભાશયના મુખના કેન્સર સામે કિશોરીઓને રક્ષણ આપવા માટે એચ.પી.વી (HPV) રસીકરણ અભિયાનનો પ્રારંભ કરવામાં આવ્યો છે. આ અભિયાનનો શુભારંભ તાલુકા હેલ્થ કચેરી સિદ્ધપુર દ્વારા તાલુકાના તમામ પ્રાથમિક આરોગ્ય કેન્દ્રો, અર્બન હેલ્થ સેન્ટરો તેમજ સામુહિક આરોગ્ય કેન્દ્રો ખાતે કરવામાં આવ્યો હતો.
કાર્યક્રમ દરમિયાન તાલુકા હેલ્થ ઓફિસર ડૉ. રાહુલ ચૌધરી દ્વારા ગર્ભાશયના મુખના કેન્સર રોગ વિશે વિસ્તૃત માહિતી આપવામાં આવી હતી. તેમણે જણાવ્યું હતું કે ૧ જાન્યુઆરી ૨૦૧૧થી ૨૯ ફેબ્રુઆરી ૨૦૧૨ દરમિયાન જન્મેલી શાળા જતી તેમજ શાળા ન જતી તમામ કિશોરીઓને સી.એચ.સી., પી.એચ.સી. અને અર્બન હેલ્થ સેન્ટર ખાતે નિઃશુલ્ક એચ.પી.વી રસી આપવામાં આવશે.
વધુમાં તેમણે જણાવ્યું હતું કે આ રસીકરણ અભિયાન અંતર્ગત સિદ્ધપુર તાલુકાની કુલ ૧૬૦૮ કિશોરીઓને રસીકરણ દ્વારા રક્ષણ આપવાનો લક્ષ્ય રાખવામાં આવ્યો છે. અભિયાનના પ્રથમ દિવસે ૧૫૦ કિશોરીઓને રસીકરણ આપવામાં આવ્યું હતું.
આ પ્રસંગે તાલુકા હેલ્થ કચેરી દ્વારા તાલુકાની તમામ જનતાને આ રસીકરણ અભિયાનમાં સહભાગી થવા અને યોગ્ય વયની તમામ કિશોરીઓને રસી અપાવવા માટે અપીલ કરવામાં આવી હતી.
આ એચ.પી.વી રસીકરણ શુભારંભ કાર્યક્રમમાં તાલુકા પંચાયત પ્રમુખ દિલીપભાઈ ઠાકોર, કાર્યાલય મંત્રી કનુજી ઠાકોર, મેળોજ ગામના ડેલીગેટ સુરેશજી ઠાકોર, ગાગલાસણ ગામના સરપંચ રોહીતજી ઠાકોર, તાલુકા હેલ્થ ઓફિસર ડૉ. રાહુલ ચૌધરી, મેડિકલ ઓફિસર, તાલુકા સુપરવાઇઝર એસ.એલ. પટેલ, ડી.બી. રાઠોડ તથા અર્બન હેલ્થ સેન્ટરનો સ્ટાફ ઉપસ્થિત રહ્યો હતો. કાર્યક્રમમાં એચ.પી.વી રસીકરણના લાભાર્થીઓ પણ હાજર રહ્યા હતા.
રિપોર્ટ: અનિલ રામાનુજ રાધનપુર, પાટણ
