સિદ્ધપુર તાલુકાના પુનાસણ ગામ નજીક નકલી પોલીસ બની એક ખેડૂતને અફીણના ગુનામાં ફસાવવાની ધમકી આપી લાખો રૂપિયા ઉઠાવનાર ટોળકીનો પર્દાફાશ થયો છે. કારમાં બેઠેલા 6 શખ્સોએ પોલીસ ઓળખ આપી હતી. આ શખ્સોએ જમીન ખરીદવા નીકળેલા ખેડૂતને અટકાવી, તેની એક્ટિવાની ડિકીમાં તમામની જાણ વગર અફીણ મૂકી ને ગુનામાં ફસાવવાની ધમકી આપી. તેમાં 3.25 લાખ રૂપિયાનો તોડ થયો હતો.
બનાવ વિશે ભોગ બની ગયેલા ખેડૂતે પોલીસ મથકમાં અરજી આપી. તેથી LCB પોલીસે કાર્યવાહી શરૂ કરી, 4 આરોપીઓને દબોચી લીધા છે. બીજા 2 ફરાર આરોપીઓને ઝડપી પાડવા પ્રયત્ન થઈ રહ્યા છે. ઝડપાયેલા લોકો પાસેથી 3.12 લાખ રૂપિયાનો મુદ્દામાલ જપ્ત કરવામાં આવ્યો છે. પોલીસ આ સમગ્ર કાવતરાનો વધુ તપાસ કરી રહી છે.
