ભરતનાટ્યમ વિશારદમાં નિષ્ઠા દવેનો રાષ્ટ્રીય વિજય
પાટણની દીકરી નિષ્ઠા દવેએ ભરતનાટ્યમ વિશારદ પૂર્ણમાં સમગ્ર ભારતમાં પ્રથમ નંબર મેળવી ઈતિહાસ રચ્યો
કેપિટલ મેસેજ
Capital Message
પાટણ: પાટણની 60 વર્ષ જૂની અને સુપ્રસિદ્ધ સંસ્થા ‘શ્રી ભોગીલાલ લહેરચંદ ભારતીય સંગીતાદિ લલિત કલા મહાવિદ્યાલય’ની વિદ્યાર્થીની કુમારી નિષ્ઠા દવેએ સમગ્ર દેશમાં પાટણ અને ગુજરાતનું નામ રોશન કર્યું છે. નિષ્ઠાએ અખિલ ગાંધર્વ મહાવિદ્યાલય મંડળ મિરજ યુનિવર્સિટી દ્વારા લેવાયેલી ‘ભરતનાટ્યમ વિશારદ પૂર્ણ’ની પરીક્ષામાં સમગ્ર ભારતમાં સૌથી વધુ માર્ક્સ મેળવીને દેશમાં પ્રથમ સ્થાન પ્રાપ્ત કર્યું છે. આ અભૂતપૂર્વ સિદ્ધિ બદલ આગામી દિવસોમાં યુનિવર્સિટી તરફથી તેને વિશેષ એવોર્ડ અને સન્માનપત્ર આપી સન્માનિત કરવામાં આવશે. કુમારી નિષ્ઠાની આ સુવર્ણ સફળતા પાછળ તેના કલા ગુરુ અલંકાર નૃત્ય એકેડેમીના પૂજાબેન બહેરા, સંગીત શાળાના આચાર્ય જગદીશભાઈ દરજી, ડૉ. સમ્યકભાઈ પારેખનું યોગ્ય માર્ગદર્શન અને તેના માતા ડૉ પદ્માક્ષીબેન વ્યાસનો અત્યંત મહત્વનો ફાળો રહ્યો છે. નિષ્ઠાની આ ગૌરવપૂર્ણ સિદ્ધિ બદલ પાટણ નગરજનો અને કલાજગત તરફથી તેના પર શુભેચ્છાઓનો વરસાદ થઈ રહ્યો છે, તેમજ તે જીવનમાં ભરતનાટ્યમ ક્ષેત્રે ઉત્તરોત્તર આવી જ પ્રગતિ કરતી રહે તેવી સૌ કોઈ આશીર્વાદ પાઠવી રહ્યા છે.
