અંડરગ્રાઉન્ડ કેબલની ખોદકામ બાદ ખાડા પૂરાયા નહીં, સિદ્ધપુરમાં અકસ્માતનો ખતરો!
સ્કૂલે જતા સાયકલ સવાર બાળકો સહિત મહિલા ખાડામાં પટકાયા; સાંકડા રસ્તે વાહનચાલકો પણ જોખમમાં, UGVCL અને નગરપાલિકા સામે સ્થાનિકોમાં રોષ
કેપિટલ મેસેજ
More Read
Capital message
સિદ્ધપુર: ધર્મ ચકલા ટાવરથી પાંજરાપોળ તરફના માર્ગ પર UGVCLના કોન્ટ્રાક્ટર દ્વારા અંડરગ્રાઉન્ડ કેબલ નાખવા માટે કરાયેલા ખોદકામ બાદ ટ્રેન્ચનું યોગ્ય રીતે પુરાણ કરી રસ્તો સમતળ કરવામાં ન આવતા સ્થાનિકો માટે મુશ્કેલી અને અકસ્માતનું જોખમ ઊભું થયું છે. નવા ટાવર પાસે ખોદકામ બાદ એક ખાડો પૂર્યા વગર જ છોડી દેવામાં આવ્યો હોવાના કારણે ખાસ કરીને સ્કૂલે જતા સાયકલ સવાર બાળકો મુશ્કેલીમાં મુકાઈ રહ્યા છે.
સ્થાનિકોના જણાવ્યા મુજબ, સાંકડા રસ્તા પર પસાર થતી વખતે સાયકલ સવાર બાળકો ખાડામાં પટકાઈ ઈજાગ્રસ્ત થયા છે. એક મહિલા પણ ખાડામાં પડી ઈજાગ્રસ્ત થયાની ઘટના સામે આવી છે. આ ઉપરાંત ટુ-વ્હીલર તેમજ ફોર-વ્હીલર વાહનો પણ ખાડામાં પટકાઈ અકસ્માત સર્જાવાની શક્યતા છે.
More Read
અંડરગ્રાઉન્ડ કેબલનું કામ પૂર્ણ થયા બાદ રસ્તાનું યોગ્ય રીતે પુરાણ, લેવલિંગ અને સમારકામ કરવાની જવાબદારી હોવા છતાં કામગીરી અધૂરી હાલતમાં છોડી દેવાતા કોન્ટ્રાક્ટરની કામગીરી સામે સવાલો ઉઠી રહ્યા છે. કામ દરમિયાન UGVCLના જવાબદાર અધિકારીઓ દ્વારા કેવું સુપરવિઝન કરવામાં આવ્યું તે અંગે પણ સ્થાનિકોમાં ચર્ચા શરૂ થઈ છે.
બીજી તરફ, સરકારી એજન્સી દ્વારા નગરપાલિકાનો રોડ ખોદવામાં આવે ત્યારે નિયમ મુજબ રોડની નુકસાની અને સમારકામ માટેની રકમ ભરપાઈ કરવામાં આવતી હોવા છતાં ખોદાયેલ માર્ગને તાત્કાલિક રીતે યોગ્ય બનાવવામાં આવ્યો નથી તેવી સ્થાનિકોની રજૂઆત છે.
સ્થાનિકોનું કહેવું છે કે, રસ્તો સંપૂર્ણપણે સમતળ કરી ખાડાઓનું તાત્કાલિક પુરાણ કરવામાં નહીં આવે તો ગંભીર અકસ્માત સર્જાઈ શકે છે. UGVCL તથા નગરપાલિકા બંને તંત્ર જવાબદારી સ્વીકારી તાત્કાલિક સ્થળની મુલાકાત લઈ રસ્તાનું યોગ્ય પુરાણ અને સમારકામ કરાવે તેવી માંગ ઉઠી છે. તંત્ર દ્વારા ઝડપી ઉકેલ લાવવામાં આવે તો ભવિષ્યમાં સંભવિત અકસ્માતો અટકાવી શકાય તેમ છે.
રિપોર્ટ. અનિલ રામાનુજ , પાટણ
