રાધનપુર-વરાણા માર્ગ પર ભાભર-ઝાલોદ બસનો અકસ્માત
ગાય સાથે બસ અથડાતા ગાયનું મોત, મુસાફરોની સુરક્ષા સામે સવાલો
કેપિટલ મેસેજ
Capital message
રાધનપુરથી વરાણા તરફ જઈ રહેલી ભાભર-ઝાલોદ બસ રસ્તામાં ગાય સાથે અથડાતા અકસ્માત સર્જાયો હતો. બસની ગાય સાથે સીધી ટક્કર થતાં ગાયનું ઘટનાસ્થળે જ મોત થયું હતું. અકસ્માત સમયે બસમાં મુસાફરો સવાર હતા. સદનસીબે કોઈ મુસાફરને ઈજા થઈ હોવાની માહિતી સામે આવી નથી, જોકે ઘટનાને પગલે મુસાફરોમાં ભયનો માહોલ સર્જાયો હતો.
રાધનપુર-વરાણા માર્ગ પર બનેલી આ ઘટનાએ રસ્તા પર રખડતા પશુઓની સમસ્યા અને મુસાફરોની સુરક્ષાને લઈને ફરી એકવાર ગંભીર સવાલો ઉભા કર્યા છે. માર્ગ પર અચાનક આવી ચડતા પશુઓના કારણે વાહનચાલકો માટે અકસ્માતનું જોખમ સતત વધી રહ્યું છે. ખાસ કરીને મુસાફરો ભરેલી બસ સાથે આવી ઘટના બને ત્યારે મોટી દુર્ઘટના સર્જાવાની શક્યતા નકારી શકાય નહીં.
More Read
આ અકસ્માતને પગલે સ્થાનિકોમાં રખડતા પશુઓની સમસ્યાના કાયમી ઉકેલની માંગ ઉઠી રહી છે. મુસાફરોની સલામતીને ધ્યાનમાં રાખીને બસચાલકો માર્ગ પર વધુ સાવચેતી રાખે તેમજ સંબંધિત તંત્ર દ્વારા રસ્તા પર રખડતા પશુઓને નિયંત્રિત કરવા યોગ્ય કાર્યવાહી કરવામાં આવે તેવી માંગ કરવામાં આવી રહી છે.
રાધનપુર-વરાણા માર્ગ પર બનેલી આ ઘટનાએ જાહેર પરિવહનમાં મુસાફરોની સુરક્ષા અને માર્ગ સલામતીના પ્રશ્નોને ફરી ચર્ચાના કેન્દ્રમાં લાવ્યા છે.
રિપોર્ટ. અનિલ રામાનુજ, પાટણ
