સરકારના સ્વદેશી મેળા ઉપક્રમથી મહિલા ઉદ્યોગસાહસિકને મળ્યો નવો અવસર
સ્વ સહાય જૂથ દ્વારા મહિલાનું આર્થિક સશક્તિકરણ: પાટણની લીનાબેન જોશીની આત્મનિર્ભરતા તરફ સફળ સફર
સરકાર દ્વારા મહિલાઓના આર્થિક સશક્તિકરણ માટે લેવામાં આવતા પ્રયાસો આજે અનેક પરિવારોના જીવનમાં સકારાત્મક પરિવર્તન લાવી રહ્યા છે. આવી જ એક પ્રેરણાદાયી ગાથા છે પાટણના લીનાબેન જોશીની, જેઓએ સદભાવ સ્વ સહાય જૂથ ગૃહ ઉદ્યોગ દ્વારા આત્મનિર્ભર બનવાની સફળ સફર કરી છે.
લીનાબેન ઘરે વિવિધ પ્રકારના ફરસાણ, સેવપુરી અને સ્વાદિષ્ટ નાસ્તા બનાવે છે. શરૂઆતમાં તેમને પોતાના ઉત્પાદનો માટે યોગ્ય બજાર અને પ્લેટફોર્મ મળતું નહોતું, જેના કારણે મહેનત છતાં આવક મર્યાદિત રહેતી હતી. ત્યારે નગરપાલિકા અને સરકાર દ્વારા આયોજિત સ્વદેશી મેળાએ તેમને નવી તક આપી.
More Read
આ મેળામાં સ્ટોલ મળતા તેમણે પોતાની બનાવટના નાસ્તા સીધા ગ્રાહકો સુધી પહોંચાડ્યા. ગુણવત્તા અને વિશ્વાસના કારણે ગ્રાહકોનો સારો પ્રતિસાદ મળ્યો અને તેમની આવકમાં નોંધપાત્ર વધારો થયો. આજે ગૃહ ઉદ્યોગમાંથી મળતી આવકથી તેઓ ઘરખર્ચ, બાળકોના શિક્ષણ તથા અન્ય જરૂરી ખર્ચો સરળતાથી સંભાળી રહ્યા છે.
લીનાબેન જણાવે છે કે સરકારના આવા આયોજન તેમના જેવા ગૃહ ઉદ્યોગકારો માટે આશીર્વાદ સમાન છે. વારંવાર આવા મેળાઓ યોજાતા રહે તો મહિલાઓને રોજગાર સાથે આત્મવિશ્વાસ અને સ્વાભિમાન પણ મળે છે.
તેઓ સરકારનો આભાર વ્યક્ત કરતાં કહે છે કે આ પહેલ મહિલાઓને આત્મનિર્ભર બનાવવા માટે ખૂબ જ મહત્વપૂર્ણ અને અસરકારક પગલું છે.
More Read
લીનાબેન જોશીની આ સફળતા ગાથા એ સાબિત કરે છે કે સરકારનો સહયોગ, યોગ્ય પ્લેટફોર્મ અને વ્યક્તિની મહેનત સાથે મળે તો નાનકડો ગૃહ ઉદ્યોગ પણ પરિવારમાં સુખ-સમૃદ્ધિ લાવી શકે છે.
