રાધનપુરમાં “Mamy Poko Pants” ડીલરશીપના નામે રૂ. 42,456ની ઓનલાઈન ઠગાઈ, પોલીસની ઝડપી કાર્યવાહીથી 100% રકમ રિકવર
ભાવનગરથી બે આરોપી ઝડપાયા, ગુજરાતભરમાં રૂ. 4.31 લાખથી વધુની સાયબર છેતરપિંડીનો પર્દાફાસ
કેપિટલ મેસેજ, ન્યુઝ
રાધનપુર શહેરમાં ડાયપર બ્રાન્ડ Mamy Poko Pantsની ડીલરશીપ આપવાના બહાને એક જનરલ સ્ટોરના વેપારી સાથે રૂ. 42,456ની ઓનલાઈન છેતરપિંડી કરનાર ગેંગનો રાધનપુર પોલીસે ભંડાફોડ કર્યો છે. ટેક્નિકલ સર્વેલન્સ અને સાયબર ટ્રેકિંગના આધારે ભાવનગર જિલ્લાના ઘોઘા વિસ્તારથી બે આરોપીઓને ઝડપી લઈને ગુનામાં વપરાયેલા મોબાઇલ, સીમકાર્ડ અને રકમ સહિત કુલ રૂ. 72,456નો મુદ્દામાલ કબ્જે કર્યો છે.
કેવી રીતે આચરાઈ ઠગાઈ?
રાધનપુરની શેરબાગ સોસાયટીમાં રહેતા અને મેઈન બજારમાં સ્વસ્તિક જનરલ સ્ટોર ચલાવતા મિલન ઠક્કરને 27 ડિસેમ્બર, 2025ના રોજ હિમાંશુ નામના શખ્સનો ફોન આવ્યો હતો. તેણે પોતાને “Mamy Poko Pants” કંપનીનો માર્કેટિંગ મેનેજર હોવાનું કહી ડીલરશીપ આપવાની વાત કરી.
આરોપીએ ‘શ્રી માર્કેટિંગ, નારોલ, અમદાવાદ’ના નામે રૂ. 42,456નું ખોટું પ્રોફોર્મા GST બિલ વોટ્સએપ પર મોકલી વિશ્વાસમાં લીધા હતા. વેપારીએ પોતાની પત્નીના HDFC બેંક ખાતામાંથી જણાવેલા ખાતામાં ઓનલાઈન ટ્રાન્સફર કરી દીધા હતા.
પેમેન્ટ બાદ માલ મોકલ્યો હોવાનો ખોટો દાવો કરી ‘વિજયલક્ષ્મી ટ્રાન્સપોર્ટ’નું નામ આપવામાં આવ્યું, પરંતુ રાધનપુરમાં એવો કોઈ જ માલ પહોંચ્યો ન હોવાનું બહાર આવ્યું. બાદમાં “પ્રતિક શાહ” નામથી વધુ રૂ. 34,000ની માંગણી કરવામાં આવી. સતત નાણાંની માંગ અને માલ ન મળતા વેપારીને શંકા જાગી.
1930 હેલ્પલાઈન પર ફરિયાદ, 100% રકમ રિકવર
વેપારીએ તાત્કાલિક સરકારની સાયબર ક્રાઈમ હેલ્પલાઈન 1930 પર ફરિયાદ નોંધાવી. NCCRP પોર્ટલ પર અરજી નોંધાતા રાધનપુર પોલીસ સ્ટેશનમાં તપાસ શરૂ થઈ. ટેક્નિકલ ટીમે મોબાઇલ નંબરો, બેંક એકાઉન્ટ અને વોટ્સએપ ચેટના આધારે આરોપીઓને ટ્રેસ કરી ઝડપ્યા.
પોલીસે ઓનલાઈન છેતરપિંડીથી મેળવેલી રૂ. 42,456ની સંપૂર્ણ રકમ રિકવર કરી છે.
ઝડપાયેલા આરોપીઓ
1. હિતેષભાઈ શાંતિભાઈ ગોહીલ, રહે. ઘોઘા, જી. ભાવનગર
2. નિરંજન હિંમતભાઈ સરધારા, રહે. વાલગેટ, ભાવનગર
કબ્જે કરાયેલ મુદ્દામાલ
ઓનલાઈન છેતરપિંડીથી મેળવેલ રોકડ રૂ. 42,456
ગુનામાં વપરાયેલા 3 મોબાઇલ (કિંમત અંદાજે રૂ. 30,000)
3 સીમકાર્ડ
કુલ મુદ્દામાલ: રૂ. 72,456
ગુજરાતભરમાં રૂ. 4.31 લાખથી વધુની ઠગાઈ
તપાસ દરમિયાન ખુલ્યું કે આરોપીઓ છેલ્લા એક વર્ષથી વિવિધ મોબાઇલ નંબરો દ્વારા પોતાને “Mamy Poko Pants”ના માર્કેટિંગ મેનેજર તરીકે ઓળખ આપી વેપારીઓને સ્કેનર મોકલી રકમ વસૂલતા હતા.
દેવભૂમિ દ્વારકા, તળાજા, કપડવંજ, બનાસકાંઠા, અંકલાવ સહિત વિવિધ વિસ્તારોમાં સાયબર અરજીઓ નોંધાઈ છે. કુલ મળીને રૂ. 4,31,705થી વધુની છેતરપિંડી કર્યાનો ખુલાસો થયો છે.
ગુનાની મોડસ ઓપરેન્ડી
મુખ્ય આરોપી અગાઉ ડાયપર કંપનીમાં નોકરી કરતો હોવાથી વેપારીઓનો ડેટાબેઝ તેની પાસે હતો. તે જ ડેટાબેઝના આધારે વેપારીઓને ફોન કરી ખોટા નામ ધારણ કરતો, મોબાઇલ એપથી નકલી GST બિલ બનાવતો અને વોટ્સએપ દ્વારા મોકલી નાણાં મંગાવતો. મેળવેલી રકમ ઓનલાઈન ગેમિંગ એકાઉન્ટમાં ટ્રાન્સફર કરતો હોવાનું બહાર આવ્યું છે.
વધુ ભોગ બનનારોએ સંપર્ક કરવા અપીલ:
રાધનપુર પોલીસે જણાવ્યું છે કે આ જ રીતથી અન્ય કોઈ વેપારી અથવા નાગરિક છેતરપિંડીનો ભોગ બન્યા હોય તો રાધનપુર પોલીસ સ્ટેશનનો સંપર્ક કરવા અપીલ કરવામાં આવે છે.હાલ પોલીસે આરોપીઓની વધુ પૂછપરછ હાથ ધરી તેમની સામે કાયદેસરની કાર્યવાહી શરૂ કરી છે.
રિપોર્ટ: અનિલ રામાનુજ
રાધનપુર, પાટણ
