રાધનપુર : રૂ.50 હજારની સામે રૂ.10 લાખ ચૂકવ્યા છતાં વધુ રૂ.4 લાખની પઠાણી ઉઘરાણી, બે વ્યાજખોરો સામે ફરિયાદ
રાધનપુરમાં વ્યાજના ત્રાસથી પિતાએ બે વખત આત્મહત્યાનો પ્રયાસ કર્યાનો ફરિયાદમાં ઉલ્લેખ : ઘરે આવી જાનથી મારી નાખવાની ધમકી આપ્યાનો આક્ષેપ, પોલીસે ગુનો નોંધી તપાસ શરૂ કરી
કેપિટલ મેસેજ
Capital message
પાટણ જિલ્લાના રાધનપુરમાં માત્ર રૂ.50 હજારની લીધેલી રકમ સામે વ્યાજ પેટે આશરે રૂ.10 લાખ ચૂકવ્યા બાદ પણ વધુ રૂ.4 લાખની પઠાણી ઉઘરાણી કરી જાનથી મારી નાખવાની ધમકી આપ્યાના આક્ષેપ સાથે બે કથિત વ્યાજખોરો સામે પોલીસ ફરિયાદ નોંધાઈ છે. સતત ત્રાસ અને ઉઘરાણીના કારણે ફરિયાદીના પિતાએ બે વખત આત્મહત્યાનો પ્રયાસ કર્યો હોવાનો પણ ફરિયાદમાં ઉલ્લેખ કરવામાં આવ્યો છે.
રાધનપુરના ગોવર્ધનધારી મંદિર સામે પરા વિસ્તારમાં રહેતા અને હાલ સુરતમાં નોકરી કરતા વિપુલભાઈ ચૌહાણે નોંધાવેલી ફરિયાદ મુજબ, સપ્ટેમ્બર 2022માં તેમના પિતાને પાન પાર્લરના ધંધા માટે નાણાંની જરૂર હોવાથી મહંમદભાઈ અહેમદભાઈ ઘાંચી અને કનુભાઈ રામશીભાઈ ભરવાડ પાસેથી રૂ.50 હજાર લીધા હતા. ફરિયાદ મુજબ આ રકમ સામે 5 ટકા લેખે વ્યાજ નક્કી કરવામાં આવ્યું હતું અને દરરોજ રૂ.2,500 વ્યાજ ચૂકવવામાં આવતું હતું.
ફરિયાદમાં આક્ષેપ કરાયો છે કે, કોઈ કારણસર નિયમિત વ્યાજ ચૂકવવામાં ન આવે ત્યારે આરોપીઓ વ્યાજનું પણ વ્યાજ ચડાવી વધુ રકમની ઉઘરાણી કરતા હતા. સતત વધતી ઉઘરાણીથી પરિવાર મુશ્કેલીમાં મુકાયો હતો. આ દરમિયાન ફરિયાદીના પિતાએ પત્નીના પાંચ તોલા સોનાના દાગીના સોની મારફતે વેચીને આરોપીઓને નાણાં ચૂકવ્યા હોવાનો પણ ફરિયાદમાં ઉલ્લેખ છે.
ફરિયાદીનો દાવો છે કે, મૂળ રૂ.50 હજારની રકમ સામે રોકડ રકમ તેમજ સોનાના દાગીના વેચીને કુલ આશરે રૂ.10 લાખ ચૂકવવામાં આવ્યા હતા. તેમ છતાં વધુ નાણાંની માંગણી ચાલુ રાખવામાં આવી હતી. આરોપીઓના કથિત સતત માનસિક ત્રાસ અને ધમકીઓથી કંટાળીને ફરિયાદીના પિતાએ બે વખત આત્મહત્યાનો પ્રયાસ કર્યો હતો, જોકે સમયસર જાણ થતાં તેમનો જીવ બચી ગયો હતો.
ફરિયાદ મુજબ, 20 એપ્રિલ 2025ના રોજ બંને આરોપીઓ ફરિયાદીના ઘરે આવ્યા હતા અને હજુ રૂ.4 લાખ લેવાના બાકી હોવાનું કહી ઉઘરાણી કરી હતી. આ દરમિયાન જાનથી મારી નાખવાની ધમકી આપ્યાનો પણ આક્ષેપ કરવામાં આવ્યો છે. સતત ત્રાસથી કંટાળેલા પરિવારજનો માર્ચ 2026માં રાધનપુર છોડીને સુરત રહેવા ગયા હોવાનું ફરિયાદમાં જણાવાયું છે.
સમગ્ર મામલે 21 સપ્ટેમ્બર 2026ના રોજ રાધનપુર પોલીસ સ્ટેશનમાં ફરિયાદ નોંધાવવામાં આવી હતી. પોલીસે બંને આરોપીઓ વિરુદ્ધ BNSની કલમ 308(2), 308(5), 351(3), 3(5) તેમજ ગુજરાત નાણાંની ધીરધાર અધિનિયમની કલમ 40 અને 42 હેઠળ ગુનો નોંધી વધુ તપાસ હાથ ધરી છે.
રિપોર્ટ. અનિલ રામાનુજ પાટણ
