હારીજના જાસ્કા ગામે ડુપ્લિકેટ વિદેશી દારૂ બનાવતી ફેક્ટરી પર એલસીબીનો દરોડો, ત્રણ આરોપી ઝડપાયા
કેપિટલ મેસેજ, ન્યુઝ
Capital message
પાટણ: જિલ્લા સ્થાનિક ગુના શાખા (એલસીબી)એ હારીજ પોલીસ મથક વિસ્તારના જાસ્કા ગામની સીમમાં દરોડો પાડી જાણીતી બ્રાન્ડના ડુપ્લિકેટ વિદેશી દારૂનું ઉત્પાદન કરતી ફેક્ટરી ઝડપી પાડી છે. આ કાર્યવાહીમાં ત્રણ આરોપીઓની ધરપકડ કરવામાં આવી છે, જ્યારે એક આરોપી ફરાર હોવાનું જાણવા મળ્યું છે. પોલીસે સ્થળ પરથી દારૂ બનાવવા માટે વપરાતી સામગ્રી સહિત કુલ રૂ. 77,100નો મુદ્દામાલ કબજે કર્યો છે.
પોલીસ મહાનિરીક્ષક પરીક્ષિતા રાઠોડ (બનાસકાંઠા રેન્જ, પાલનપુર) તથા પાટણ જિલ્લા પોલીસ અધિક્ષક વી.કે. નાયીના માર્ગદર્શન હેઠળ આગામી રથયાત્રાને ધ્યાનમાં રાખી જિલ્લામાં કોમ્બિંગ નાઇટનું આયોજન કરવામાં આવ્યું હતું. પ્રોહિબિશન અને જુગાર જેવી ગેરકાયદેસર પ્રવૃત્તિઓ સામે અસરકારક કાર્યવાહી કરવા આપવામાં આવેલી સૂચનાઓના અનુસંધાને એલસીબીના પોલીસ ઇન્સ્પેક્ટર આર.જી. ઉનાગરના માર્ગદર્શન હેઠળ એલસીબીની ટીમ હારીજ વિસ્તારમાં પેટ્રોલિંગ કરી રહી હતી.
દરમિયાન મળેલી ચોક્કસ બાતમીના આધારે જાસ્કા ગામની અરીઠાવાળા આંટા તરીકે ઓળખાતી સીમમાં ભરતસિંહ ભીખુજી રાઠોડના કબજાના ખેતરમાં આવેલી ઓરડી પર દરોડો પાડવામાં આવ્યો હતો. તપાસ દરમિયાન ત્યાં જાણીતી બ્રાન્ડ Blenders Pride Whisky નામે ડુપ્લિકેટ વિદેશી દારૂ બનાવવાનું કામ ચાલી રહ્યું હોવાનું બહાર આવ્યું હતું.
પોલીસે સ્થળ પરથી ભરતસિંહ ભીખુજી રાઠોડ (રહે. જાસ્કા), ચાંપરાજ સોમભાઈ કાઠી (રહે. વિરમગામ) અને કુંવરસિંહ શીવુજી ઝાલા (રહે. શંખેશ્વર)ની ધરપકડ કરી હતી. જ્યારે શિવરાજ મારવાડી (રહે. જોધપુર, રાજસ્થાન) ફરાર હોવાનું સામે આવ્યું છે, જેને ઝડપી પાડવા માટે પોલીસે કાર્યવાહી શરૂ કરી છે.
દરોડા દરમિયાન પોલીસે Blenders Pride નામની 750 એમએલની 60 સીલબંધ બોટલો, સ્ટીકરના રોલ, સીલિંગ પટ્ટીઓ, પ્લાસ્ટિકની ડોલ અને ટબ, 700 કાળા ઢાંકણા, 700 ખાલી કાચની બોટલો તેમજ ત્રણ મોબાઇલ ફોન મળી કુલ રૂ. 77,100નો મુદ્દામાલ જપ્ત કર્યો હતો.
આ અંગે હારીજ પોલીસ મથકે પ્રોહિબિશન અધિનિયમ હેઠળ ગુનો નોંધી વધુ તપાસ હાથ ધરવામાં આવી છે.
આ સમગ્ર કાર્યવાહી એલસીબી પાટણના પોલીસ ઇન્સ્પેક્ટર આર.જી. ઉનાગરના માર્ગદર્શન હેઠળ પીએસઆઈ એસ.બી. સોલંકી, પીએસઆઈ પી.વી. ચૌધરી, એએસઆઈ જાલુભા બાલસંગજી,અ.હેડ.કો. કુલદીપકુમાર લક્ષ્મીદાસ, અ.હેડ.કો. લખનકુમાર અમૃતભાઇ, અ.હેડકો. હસમુખસિંહ અમરાભાઇ, આ.પો.કો મનુભાઇ કરસનભાઇ, આ.પો.કો ઇંદ્રજીતસિંહ લાખાજી, ડ્રા.પો.કોન્સ. બીપીનકુમાર વેરશીજી તેમજ એલસીબીની ટીમે સફળતાપૂર્વક પાર પાડી હતી.
