રાધનપુર રેફરલ હોસ્પિટલના તબીબોની સમયસૂચકતા: બાળકના મોઢામાં ઘૂસેલો લોખંડનો સળિયો સફળતાપૂર્વક બહાર કાઢ્યો
રમતાં-રમતાં સર્જાયેલી ગંભીર દુર્ઘટના બાદ 108 મારફતે હોસ્પિટલ પહોંચેલા બાળકને તાત્કાલિક સારવાર; તબીબો અને સહયોગી ટીમની કામગીરીની સરાહના
કેપિટલ મેસેજ
More Read
Capital message
પાટણ જિલ્લાના રાધનપુર ખાતે આવેલી રેફરલ હોસ્પિટલમાં તબીબોની સમયસૂચકતા, કુશળતા અને ટીમવર્કનું ઉત્તમ ઉદાહરણ સામે આવ્યું છે. સમી તાલુકાના વેળ ગામે રમતાં-રમતાં યુનુસ ખાનના બાળકના મોઢામાં લોખંડનો સળિયો ઘૂસી જતાં ગંભીર પરિસ્થિતિ સર્જાઈ હતી. ઘટનાની જાણ થતાં પરિવારજનો બાળકને 108 એમ્બ્યુલન્સ મારફતે રાધનપુર રેફરલ હોસ્પિટલ ખાતે લઈ આવ્યા હતા, જ્યાં તબીબોની ટીમે તાત્કાલિક સારવાર હાથ ધરી બાળકના મોઢામાં ફસાયેલો લોખંડનો સળિયો સફળતાપૂર્વક બહાર કાઢ્યો હતો.
More Read
બાળકની ગંભીર સ્થિતિને ધ્યાનમાં રાખીને રેફરલ હોસ્પિટલના ડૉ. બરોડાવાલા, ડૉ. અરવિંદભાઈ ચૌધરી સહિતના તબીબી સ્ટાફે તાત્કાલિક કામગીરી શરૂ કરી હતી. સારવારની પ્રક્રિયામાં સોઢા ડેન્ટલ ક્લિનિકના ડૉ. ધર્મેન્દ્રસિંહ સોઢા, સીફા ક્લિનિકના ડૉ. અજમેરી સાહેબ અને એનેસ્થેસિયા વિભાગના ડૉ. સાહિલભાઈ પ્રજાપતિએ પણ સહયોગ આપ્યો હતો. રાધનપુર નગરપાલિકાના ઉપપ્રમુખ હરેશભાઈ ઠક્કર સહિત રેફરલ હોસ્પિટલના સ્ટાફે પણ સમગ્ર પ્રક્રિયામાં સહયોગ આપ્યો હતો.
તબીબો અને સહયોગી ટીમે સંકલન સાથે સમયસર સારવાર આપતાં બાળકના મોઢામાં ફસાયેલો લોખંડનો સળિયો બહાર કાઢવામાં સફળતા મળી હતી. આવી ગંભીર પરિસ્થિતિમાં સમયસર સારવાર અને તબીબી કુશળતા મહત્ત્વપૂર્ણ સાબિત થઈ હતી. બાળકને તાત્કાલિક સારવાર મળી રહે તે માટે હોસ્પિટલની ટીમે કરેલી કામગીરીની સરાહના થઈ રહી છે.
કટોકટીની ઘડીએ તબીબોની સેવાભાવનાનું ઉદાહરણ
આ ઘટનાએ ફરી એકવાર દર્શાવ્યું છે કે કટોકટીની ઘડીએ તબીબોની સમયસૂચકતા, ફરજ પ્રત્યેની નિષ્ઠા અને ટીમવર્ક દર્દી માટે કેટલાં મહત્ત્વપૂર્ણ બને છે. બાળકને ગંભીર પરિસ્થિતિમાંથી ઉગારવા માટે તબીબો અને સહયોગી સ્ટાફે કરેલી કામગીરી આરોગ્યસેવાની માનવતાભરી ભૂમિકાને ઉજાગર કરે છે.
રિપોર્ટ. અનિલ રામાનુજ, પાટણ
