ડિજિટલ ક્રોપ સર્વેનું વેરિફિકેશન હવે AI બોટ દ્વારા
એગ્રીસ્ટેક યોજના હેઠળ ખેતીમાં પારદર્શિતા અને આધુનિકતા તરફ મહત્વપૂર્ણ પગલું
ભારત સરકારની મહત્ત્વાકાંક્ષી ‘એગ્રીસ્ટેક’ યોજના અંતર્ગત ખેતી ક્ષેત્રે આધુનિકતા લાવવા અને ડેટા વ્યવસ્થાપનમાં પારદર્શિતા વધારવાના ઉદ્દેશથી ડિજિટલ ક્રોપ સર્વેની કામગીરી અમલમાં મુકવામાં આવી છે. આ પ્રક્રિયાને વધુ ચોક્કસ અને વિશ્વસનીય બનાવવા માટે હવે AI બોટ સિસ્ટમ દ્વારા ડેટા વેરિફિકેશનની નવી વ્યવસ્થા શરૂ કરવામાં આવી છે.
હાલમાં રવિ ઋતુ દરમિયાન સર્વેથરો દ્વારા ખેતરોની સ્થળ મુલાકાત લઈ મોબાઈલ એપ્લિકેશન મારફતે પાકના જીઓ-ટેગ સાથે ફોટોગ્રાફ્સ અને સંબંધિત વિગતો નોંધવામાં આવી છે. આ નોંધાયેલ માહિતીની સચોટતા સુનિશ્ચિત કરવા માટે AI આધારિત બોટ ટેકનોલોજીનો ઉપયોગ કરવામાં આવી રહ્યો છે.
More Read
ડિજિટલ ક્રોપ સર્વે પૂર્ણ થયેલા ખેડૂતોનો સંપર્ક ઓટોમેટેડ વોઇસ કોલ અથવા વોટ્સએપ મેસેજ દ્વારા કરવામાં આવશે. આ કોલ અથવા મેસેજ મારફતે ખેડૂતો પાસેથી તેમના ખેતર તથા પાક સંબંધિત વિગતોની પુષ્ટિ લેવામાં આવશે.
ખેતી નિયામકની કચેરી દ્વારા જિલ્લાના તમામ ખેડૂતોને વિનંતી કરવામાં આવી છે કે તેઓ આવા કોલ અથવા મેસેજ પ્રાપ્ત થાય ત્યારે ખેતર અને પાક અંગે સાચી તથા સચોટ માહિતી પ્રદાન કરે.
આ સરકારી પહેલ ખેડૂતોને ભવિષ્યમાં વિવિધ કૃષિ સહાય યોજનાઓનો લાભ ઝડપી અને પારદર્શક રીતે મળી રહે તે માટે અત્યંત ઉપયોગી સાબિત થશે. સાથે જ, કોઈપણ પ્રકારની અફવા અથવા ગેરમાર્ગે દોરનારી માહિતીથી દૂર રહેવાની સલાહ પણ આપવામાં આવી છે.
More Read
જિલ્લા ખેતીવાડી અધિકારીએ જિલ્લાના તમામ ખેડૂતોને આ ડિજિટલ પહેલમાં સક્રિય સહયોગ આપવા અને સરકારી પ્રક્રિયાઓ પ્રત્યે જાગૃત રહેવા અપીલ કરી છે.
