જિલ્લા તાલુકા પંચાયત અને નગરપાલિકાની નિષ્પક્ષ ચૂંટણી માટે તંત્ર સજ્જ:અધિકારીઓને આપવામાં આવી તાલીમ
ચૂંટણી પ્રક્રિયા સુવ્યવસ્થિત બનાવવા કલેકટર કચેરી પાટણ ખાતે તાલીમ કાર્યક્રમ યોજાયો
કેપિટલ મેસેજ, ન્યુઝ
More Read
આગામી સમયમાં યોજાનાર તાલુકા પંચાયત, જિલ્લા પંચાયત તેમજ નગરપાલિકાની સામાન્ય ચૂંટણી–૨૦૨૬ને ધ્યાનમાં રાખી પૂર્વ તૈયારીઓના ભાગરૂપે પાટણ જિલ્લા વહીવટી તંત્ર દ્વારા મહત્વપૂર્ણ તાલીમ કાર્યક્રમનું આયોજન કરવામાં આવ્યું હતું.
આ અનુસંધાને જિલ્લા કલેક્ટર કચેરી ખાતે જિલ્લા સ્તરના તમામ ચૂંટણી અધિકારીઓ તથા મદદનીશ ચૂંટણી અધિકારીઓ માટે જિલ્લા માસ્ટર ટ્રેનર્સ દ્વારા વ્યાપક તાલીમ આપવામાં આવી હતી. તાલીમ દરમિયાન ચૂંટણી પ્રક્રિયા સંબંધિત વિવિધ મુદ્દાઓ અંગે વિગતવાર માર્ગદર્શન આપવામાં આવ્યું હતું, જેમાં મતદાન પ્રક્રિયા, EVM/VVPAT નો ઉપયોગ, આદર્શ આચાર સંહિતા, કાનૂની જોગવાઈઓ તથા પારદર્શક અને નિષ્પક્ષ ચૂંટણી યોજવા માટેના જરૂરી પાસાઓ પર ખાસ ભાર મૂકવામાં આવ્યો હતો.
આ તાલીમ કાર્યક્રમમાં નિવાસી અધિક કલેક્ટર, ચીટનીશ ટુ કલેક્ટર તેમજ જિલ્લા માસ્ટર ટ્રેનર્સ હાજર રહ્યા હતા અને તેમના માર્ગદર્શન હેઠળ તાલીમ સફળતાપૂર્વક પૂર્ણ કરવામાં આવી હતી.
જિલ્લા વહીવટી તંત્ર દ્વારા આવનારી ચૂંટણી નિષ્પક્ષ, પારદર્શક અને સુવ્યવસ્થિત રીતે યોજાય તે માટે તમામ જરૂરી તૈયારીઓ સુનિશ્ચિત કરવામાં આવી રહી છે.
