ચિલ્ડ્રન રિસર્ચ યુનિવર્સિટી અને સમર્પણ આર્ટ્સ એન્ડ કોમર્સ કોલેજના સંયુક્ત તત્વધાનમાં ‘સેતુ’ કાર્યક્રમ નું આયોજન કરાયું
કેપિટલ મેસેજ, ન્યુઝ
ચિલ્ડ્રન રિસર્ચ યુનિવર્સિટી અને સમર્પણ આર્ટ્સ એન્ડ કોમર્સ કોલેજના સંયુક્ત તત્વધાનમાં ‘સેતુ’ કાર્યક્રમ અંતર્ગત “સેફ, હેલ્ધી એન્ડ ઇન્ક્લુસિવ સ્પેસીસ” વિષયક જેન્ડર સેન્સિટાઈઝેશન, ન્યુટ્રિશન અને POSH અંગે જાગૃતિ કેળવવા એક દિવસીય સેમિનારનું આયોજન કરવામાં આવ્યું હતું. આ કાર્યક્રમનું આયોજન ગાંધીનગર ચેરિટેબલ ટ્રસ્ટના ટ્રસ્ટી મહેન્દ્રસિંહ વાઘેલા તથા ચિલ્ડ્રન્સ રિસર્ચ યુનિવર્સિટીના કુલપતિ ડૉક્ટર ટી. એસ. જોશીની પ્રેરણાથી સમર્પણ આર્ટ્સ એન્ડ કોમર્સ કોલેજ અને ચિલ્ડ્રન્સ રિસર્ચ યુનિવર્સિટી દ્વારા સંયુક્ત રીતે કરવામાં આવ્યું હતું, જેમાં જેન્ડર રિસોર્સ સેન્ટર તથા મહિલા અને બાળ વિકાસ વિભાગ, ગુજરાત સરકારનો સહયોગ રહ્યો હતો.
More Read
કાર્યક્રમના અધ્યક્ષ અને સમર્પણ આર્ટસ એન્ડ કોમર્સ કોલેજના આચાર્ય ડૉ. આશિષ જનકરાય દવેએ સેમિનારના ઉદ્ઘાટન પ્રસંગે કહ્યું કે ભારતીય પરંપરામાં પુરુષ અને પ્રકૃતિ તથા અર્ધનારેશ્વરની વિભાવના યુગો પુરાણી છે, જેમાં સ્ત્રી-પુરુષનું સ્થાન દરેક ક્ષેત્રમાં સમતોલ છે. સેમિનારમાં નિષ્ણાત વક્તાઓમાં જેન્ડર રિસોર્સ સેન્ટરના મહેન્દ્રભાઇ મકવાણા, મનોવૈજ્ઞાનિક શૈલેન્દ્રકુમારી ઝાલા તથા ન્યુટ્રિશન એક્સપર્ટ ભરતભાઇ ગોઠી દ્વારા લિંગ સંવેદનશીલતા, પોષણનું મહત્વ તેમજ કાર્યસ્થળે મહિલાઓ પ્રત્યેના યૌન ઉત્પીડન નિવારણ (POSH) અંગે વિસ્તૃત માર્ગદર્શન આપ્યું હતું. સુરક્ષિત સ્ત્રી, સ્વસ્થ યુવા અને શક્તિશાળી સમાજ તે સેમિનારનો મુખ્ય સંદેશ રહ્યો. કાર્યક્રમના અંતે વિદ્યાર્થીઓના પ્રશ્નોનું નિરાકરણ કરી નિષ્ણાતોએ યોગ્ય માર્ગદર્શન આપ્યું હતું.
આ કાર્યક્રમ દ્વારા વિદ્યાર્થીઓમાં જાગૃતિ અને સંવેદનશીલતા વધારવાનો મહત્વપૂર્ણ પ્રયાસ સફળ રહ્યો હતો. ડૉ. ઋચા બ્રહ્મભટ્ટ, ડૉ. રૂપમ ઉપાધ્યાય તથા કુ. દેવાંગી સાંડેસરાએ કાર્યક્રમનું સફળતાપૂર્વક સંયોજન કર્યું.
રિપોર્ટ: અનિલ રામાનુજ રાધનપુર, પાટણ
