પાટણ જિલ્લામાં પેટ્રોલ- ડીઝલની કાળાબજારી અને સંગ્રહખોરી સામે તંત્ર સજ્જ
છેલ્લા ૨૪ કલાકમાં ૪૫ પેટ્રોલ પંપ પર તપાસ, નિયમભંગ સામે કડક કાર્યવાહી થશે
કેપિટલ મેસેજ, ન્યુઝ
Capital message
પાટણ જિલ્લામાં પેટ્રોલ અને ડીઝલની વર્તમાન પરિસ્થિતિને ધ્યાનમાં રાખીને જિલ્લા વહીવટી તંત્ર દ્વારા કાળાબજારી અને સંગ્રહખોરી અટકાવવા માટે કડક દેખરેખ અને મોનીટરીંગ હાથ ધરવામાં આવ્યું છે. જિલ્લા પુરવઠા અધિકારીએ જિલ્લાના નાગરિકોને અફવાઓથી દૂર રહી જરૂરીયાત મુજબ જ ઈંધણની ખરીદી કરવા અપીલ કરી છે.
નિયામક, ગાંધીનગરની સૂચનાઓ અનુસાર કૃષિ કામ માટે ખેડૂતોને ખુલ્લા પાત્ર અથવા બેરલમાં વધુમાં વધુ ૨૦૦ લીટર સુધી પેટ્રોલ/ડીઝલ મેળવવાની છૂટ આપવામાં આવી છે. ટેલિકોમ મોબાઇલ કંપનીઓને વધુમાં વધુ ૧૦૦૦ લીટર સુધીનો જથ્થો બેરલમાં મેળવવાની મંજૂરી આપવામાં આવી છે. તેમજ જિલ્લાના ઇન્ફાસ્ટ્રક્ચર પ્રોજેક્ટ્સ અને ઔદ્યોગિક એકમોને છેલ્લા છ મહિનાની સરેરાશ વપરાશના આધારે ઈંધણ ફાળવવામાં આવશે.
સામાન્ય વાહનચાલકોને માત્ર વાહનની ટાંકીમાં જ ઈંધણ પુરું પાડવા માટે સૂચના આપવામાં આવી છે. વર્તમાન પરિસ્થિતિમાં ખોટી અફવાઓને આધારે પેટ્રોલ પંપ પર અનાવશ્યક ભીડ ન કરવા જિલ્લા તંત્રએ અપીલ કરી છે.
જિલ્લામાં પેટ્રોલ-ડીઝલના વિતરણમાં પારદર્શિતા જળવાઈ રહે તે માટે જિલ્લા પુરવઠા અધિકારીની ટીમ તેમજ તાલુકા મામલતદારઓ દ્વારા સતત ચકાસણી હાથ ધરવામાં આવી રહી છે. છેલ્લા ૨૪ કલાક દરમિયાન જિલ્લામાં કુલ ૪૫ પેટ્રોલ/ડીઝલ પંપની મુલાકાત લઈ વિતરણ કામગીરી સરકારના નિયમો મુજબ થઈ રહી છે કે નહીં તેની તપાસ કરવામાં આવી છે.
જિલ્લામાં કાયદો અને વ્યવસ્થા જળવાઈ રહે તે હેતુસર નાયબ જિલ્લા પોલીસ અધિક્ષકને પણ જરૂરી સૂચનાઓ આપવામાં આવી છે.
જિલ્લા તંત્રએ સ્પષ્ટ ચેતવણી આપી છે કે કોઈપણ પેટ્રોલ પંપ ડીલર અથવા નાગરિક દ્વારા પેટ્રોલ/ડીઝલની કાળાબજારી કે સંગ્રહખોરી કરવામાં આવશે તો તેમની સામે કાળાબજાર અધિનિયમ-૧૯૮૦ તથા આવશ્યક ચીજવસ્તુ અધિનિયમ-૧૯૫૫ હેઠળ કડક કાનૂની કાર્યવાહી કરવામાં આવશે.
જિલ્લામાં પેટ્રોલ અને ડીઝલનું સુચારૂ અને નિયમબદ્ધ વિતરણ જળવાઈ રહે તે માટે સરકારની સૂચનાઓનું ચુસ્તપણે પાલન કરવું અત્યંત જરૂરી હોવાનું જિલ્લા વહીવટી તંત્રએ જણાવ્યું છે.
