પાટણમાં આંતરરાષ્ટ્રીય મહિલા દિવસ અનુસંધાને “આંતરરાષ્ટ્રીય મહિલા કિસાન વર્ષ” વિષય પર ભવ્ય ઉજવણી કાર્યક્રમ યોજાયો
કેપિટલ મેસેજ, ન્યુઝ
પાટણ શહેરમાં આવેલ હોટલ ગ્રાન્ડ પિયાનો ખાતે નાબાર્ડ અને રિલાયન્સ ફાઉન્ડેશન જેવી સેવાભાવી સંસ્થાઓના સંયુક્ત આયોજન હેઠળ આંતરરાષ્ટ્રીય મહિલા દિવસ અનુસંધાને “આંતરરાષ્ટ્રીય મહિલા કિસાન વર્ષનો જશ્ન” વિષય પર ચર્ચા-વિચારણા અને માહિતી સાથે ભવ્ય ઉજવણી કાર્યક્રમ યોજાયો હતો.
કાર્યક્રમમાં મુખ્ય મહેમાન તરીકે ડૉ. પ્રિયાબેન પટેલ અને ડૉ. અંજલીબેન ઉપસ્થિત રહ્યા હતા. તેમણે મહિલાઓના સશક્તિકરણ, કૃષિ ક્ષેત્રમાં મહિલાઓની મહત્વપૂર્ણ ભૂમિકા તેમજ મહિલાઓના આરોગ્ય વિવિધ પ્રકારની બીમારી તથા કેન્સર અંગે મહત્વપૂર્ણ સાવચેતી રૂપી માહિતી અને માર્ગદર્શન આપ્યું હતું.
More Read
અતિથિ વિશેષ તરીકે કુલદીપસિંહ ગહેલોત એલ.ડી.એમ. પાટણ, નિરપતભાઈ જિલ્લા પ્રોજેક્ટ મેનેજર, રિલાયન્સ ફાઉન્ડેશન તથા દિનેશભાઈ દગદી આરસેટી પાટણ ઉપસ્થિત રહ્યા હતા. મહાનુભાવોએ મહિલાઓને સ્વરોજગાર, આત્મનિર્ભરતા, વિવિધ સરકારી યોજનાઓ તેમજ કૃષિ ક્ષેત્રમાં આધુનિક પદ્ધતિઓ અંગે માર્ગદર્શન આપ્યું હતું.
કાર્યક્રમ દરમિયાન મહિલાઓને આરોગ્ય સંબંધિત મહત્વપૂર્ણ માહિતી તેમજ સ્વરોજગારની તકો અંગે વિગતવાર માર્ગદર્શન આપવામાં આવ્યું હતું. મહિલા કિસાનોના યોગદાનને બિરદાવવામાં આવ્યું હતું અને તેમને કૃષિ ક્ષેત્રમાં વધુ પ્રગતિ માટે પ્રેરણા આપવામાં આવી હતી.
More Read
ગીતાબેન જગ્ગી એ જણાવ્યું હતુ કે હું પાટણ જિલ્લામાં નાબાર્ડના ડીડીએમ (ડિસ્ટ્રીકટ ડેવલોપમેન્ટ મેનેજર) તરીકે કાર્યરત છું. મને પાટણમાં ડીડીએમ તરીકે કામ કરતા એક વર્ષ પૂર્ણ થયું છે. આ અગાઉ હું અમદાવાદમાં નાબાર્ડની પ્રાદેશિક કચેરીમાં કાર્યરત હતી. છેલ્લા એક વર્ષથી મારી બદલી અહીં પાટણમાં થઈ છે. અહીં તાલીમ કાર્યક્રમો તો સતત ચાલતા જ રહે છે, પરંતુ આ વર્ષે અમે કેટલાક નવા પ્રોગ્રામ શરૂ કરવા જઈ રહ્યા છીએ. જેમાં મુખ્યત્વે:
એમઈડીપી (માઈક્રો એન્ટરપ્રાઇઝ ડેવલોપમેન્ટ પ્રોગ્રામ) આ એક લઘુ ઉદ્યોગ વિકાસ કાર્યક્રમ છે.
ગ્રામ દુકાન આ માટેનો એક નવો પ્રસ્તાવ પણ અમે તૈયાર કર્યો છે.
તાલીમ અને મહિલા સશક્તિકરણ માટે એમઈડીપી અંતર્ગત લગભગ ૧૫ થી ૨૦ દિવસનો તાલીમ કાર્યક્રમ યોજવામાં આવશે. આ માટે અમે ખાસ કરીને સાંતલપુર તાલુકાની પસંદગી કરી છે. ત્યાંની મહિલાઓને આ તાલીમ આપવામાં આવશે જેથી તેઓ ભવિષ્યમાં પોતાનો સ્વતંત્ર વ્યવસાય ઊભો કરી શકે અને આર્થિક રીતે સક્ષમ બની શકે.
કાર્યક્રમમાં મોટી સંખ્યામાં મહિલાઓએ ઉત્સાહભેર હાજરી આપી હતી અને સમગ્ર કાર્યક્રમ સફળતાપૂર્વક પૂર્ણ થયો હતો.
