પાટણ કોર્ટમાં ખળભળાટ! ધોળા દિવસે વકીલો પર ધારિયા વડે હુમલો થતા સુરક્ષા સામે ઉઠ્યા ગંભીર સવાલો. વકીલોની સુરક્ષા રામ ભરોસે?
અણધાર્યા હુમલાથી વકીલ રૂમમાં અફરાતફરી મચી, સુરક્ષા સામે સવાલ, વકીલો હડતાલ પર
કેપિટલ મેસેજ, ન્યુઝ
પાટણ જિલ્લા અદાલતના ગ્રાઉન્ડ ફ્લોર પર આવેલા વકીલ રૂમમાં એક અજાણ્યા શખ્સે ધારિયા વડે હુમલો કર્યો હતો. આ ઘટનાથી કોર્ટ પરિસરમાં સુરક્ષા વ્યવસ્થા સામે સવાલો ઊભા થયા છે. સદનસીબે, આ હુમલામાં કોઈ જાનહાનિ થઈ નથી, પરંતુ વકીલોએ કામકાજથી અળગા રહીને હડતાલ જાહેર કરી છે.
More Read
ઘટના પાટણ જિલ્લા કોર્ટમાં દિવસ દરમિયાન બની હતી, જ્યારે 200 થી વધુ વકીલો ગ્રાઉન્ડ ફ્લોર પરના વકીલ રૂમમાં હાજર હતા. અજાણ્યા હુમલાખોરે પોતાના ફેટામાં છુપાવેલું ધારિયું કાઢીને વકીલો પર ફેંક્યું હતું. આ અણધાર્યા હુમલાથી અફરાતફરી મચી ગઈ હતી, પરંતુ કોઈ વકીલને ઈજા થઈ ન હતી. હાજર વકીલોએ હિંમતભેર હુમલાખોરને પકડી પાડી બી-ડિવિઝન પોલીસને સોંપ્યો હતો. ઘટનાની જાણ થતાં જ પોલીસનો મોટો કાફલો કોર્ટ પરિસરમાં પહોંચ્યો હતો.
આ ઘટનાને કારણે વકીલોમાં ભારે રોષ પ્રવર્તી રહ્યો છે. વકીલ આર.ડી. દેસાઈએ જણાવ્યું હતું કે, હુમલાખોર અગાઉ પણ બે-ચાર વખત વકીલ રૂમમાં આવ્યો હતો. વકીલોએ આક્ષેપ કર્યો છે કે 10 દિવસ પહેલા પ્રિન્સિપલ ડિસ્ટ્રિક્ટ જજને લેખિતમાં રજૂઆત કરવામાં આવી હતી કે કોર્ટમાં અજાણી વ્યક્તિઓની તપાસ કરવામાં આવે અને હથિયારધારી પોલીસની તૈનાતી વધારવામાં આવે. તેમ છતાં સુરક્ષામાં ગંભીર બેદરકારી દાખવવામાં આવી હતી.
More Read
સૂત્રોના જણાવ્યા અનુસાર, કોર્ટમાં બે દિવસ પહેલા જ મેટલ ડિટેક્ટર મૂકવામાં આવ્યું હતું, પરંતુ તેનું ફિટિંગ બાકી હોવાથી તેનો ઉપયોગ શરૂ થયો નહોતો. આનો લાભ લઈને હુમલાખોર હથિયાર સાથે અંદર ઘૂસી શક્યો હતો.
પાટણ જિલ્લા ડિસ્ટ્રિક્ટ બારના પ્રમુખ સુભાષ એચ. ઠાકોરે આ હુમલાને ગંભીર ગણાવ્યો હતો. તેમણે જણાવ્યું કે, વકીલોની સુરક્ષા સાથે કોર્ટ પરિસરની સુરક્ષા પણ અનિવાર્ય છે. વકીલોએ પ્રિન્સિપલ ડિસ્ટ્રિક્ટ જજ (PDJ) સમક્ષ માંગણી કરી છે કે આ મામલે જિલ્લા રજિસ્ટ્રાર દ્વારા તાત્કાલિક પોલીસ ફરિયાદ દાખલ કરવામાં આવે અને ઘટનાસ્થળનું પંચનામું કરવામાં આવે. વકીલોએ ઘટનાના CCTV ફૂટેજની પણ માંગણી કરી છે. તેમણે સ્પષ્ટ કર્યું છે કે જ્યાં સુધી પોલીસ ફરિયાદ અને પંચનામું નહીં થાય ત્યાં સુધી તેઓ કામકાજથી અળગા રહેશે.
આ સમગ્ર મામલે હવે વકીલો દ્વારા ‘એડવોકેટ પ્રોટેક્શન એક્ટ’ની માંગણી તેજ કરવામાં આવી છે. વકીલોનું કહેવું છે કે જેમ હોસ્પિટલોમાં ડોક્ટરોની સુરક્ષા માટે કાયદાકીય જોગવાઈઓના બોર્ડ હોય છે, તેમ વકીલો પર થતા હુમલા રોકવા માટે પણ કડક પ્રોટેક્શન બિલ લાવવું જોઈએ.હાલમાં પાટણના તમામ વકીલો કામકાજ બંધ રાખી હડતાલ પર ઉતર્યા છે અને એસ.પી. તેમજ કલેક્ટરને રજૂઆત કરી હથિયારધારી પોલીસ અને કડક ચેકિંગની માંગણી કરવામાં આવી છે.
રિપોર્ટ. અનિલ રામાનુજ રાધનપુર
