સમીમાં ધોરણ-10 બોર્ડ પરીક્ષાનો મંગલ પ્રારંભ: કુમકુમ તિલક અને મોં મીઠું કરાવી વિદ્યાર્થીઓને આત્મવિશ્વાસભર આવકાર
શાંતિપૂર્ણ માહોલમાં પ્રથમ પેપર શરૂ, પોલીસનો ચુસ્ત બંદોબસ્ત
કેપિટલ મેસેજ, ન્યુઝ
પાટણ:ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા આયોજિત ધોરણ-10ની વાર્ષિક પરીક્ષાનો સમી શહેરમાં મંગલ પ્રારંભ થયો હતો. સમીની પ્રતિષ્ઠિત શ્રી પી. આર. પરમાર હાઇસ્કૂલ ખાતે પરીક્ષા આપવા આવેલા વિદ્યાર્થીઓનું શાળા પરિવાર દ્વારા પરંપરાગત અને લાગણીસભર સ્વાગત કરવામાં આવ્યું હતું.
More Read
પરીક્ષાના પ્રથમ દિવસે વિદ્યાર્થીઓમાં રહેલા માનસિક તણાવ અને ભયને હળવો કરવા માટે શાળાના પ્રવેશદ્વાર પર જ શિક્ષકો દ્વારા દરેક વિદ્યાર્થીને માંગલિક કુમકુમ તિલક કરી અને મોં મીઠું કરાવી આવકાર આપવામાં આવ્યો હતો. આ અનોખી અને પ્રેરણાદાયી પહેલને કારણે વિદ્યાર્થીઓના ચહેરા પર સ્મિત અને આત્મવિશ્વાસની ઝળહળાહટ જોવા મળી હતી. વાલીઓએ પણ શાળાની આ પહેલને બિરદાવી હતી.
શાળાના આચાર્ય ભાવસંગજી ઠાકોરે જણાવ્યું હતું કે બોર્ડ દ્વારા નિર્ધારિત તમામ ગાઇડલાઇનનું પાલન કરીને પરીક્ષાનું સુચારુ આયોજન કરવામાં આવ્યું છે. પરીક્ષા કેન્દ્ર પર શાંતિપૂર્ણ, શિસ્તબદ્ધ અને નકલમુક્ત માહોલ જળવાઈ રહે તે માટે ખાસ તકેદારી રાખવામાં આવી છે. વિદ્યાર્થીઓ ભયમુક્ત વાતાવરણમાં પરીક્ષા આપી શકે તે માટે શિક્ષકમંડળ સતત માર્ગદર્શન આપી રહ્યું છે.
More Read
શિક્ષક શૈલેન્દ્રસિંહ સોઢાએ વિદ્યાર્થીઓને સંદેશ આપતાં જણાવ્યું કે પરીક્ષા માત્ર જ્ઞાનની કસોટી નથી, પરંતુ ધીરજ, એકાગ્રતા અને આત્મવિશ્વાસની પણ ઓળખ છે. મનને શાંત રાખીને અને સંપૂર્ણ એકાગ્રતા સાથે પેપર લખવા તેમણે વિદ્યાર્થીઓને પ્રોત્સાહિત કર્યા હતા. મહેનતનું ફળ ચોક્કસપણે ઉજ્જવળ પરિણામ સ્વરૂપ મળશે તેવી શુભેચ્છાઓ પાઠવવામાં આવી હતી.
પરીક્ષા કેન્દ્ર પર બેસવાની વ્યવસ્થા, પ્રશ્નપત્ર વિતરણ અને દેખરેખ સહિત તમામ પ્રક્રિયા સુવ્યવસ્થિત રીતે હાથ ધરવામાં આવી હતી. સમગ્ર આયોજનથી વિદ્યાર્થીઓ અને વાલીઓમાં સંતોષની લાગણી વ્યાપી હતી.
પરીક્ષા દરમિયાન કાયદો અને વ્યવસ્થા જળવાઈ રહે તે માટે સમી પોલીસ સ્ટેશન દ્વારા પણ ચુસ્ત બંદોબસ્ત ગોઠવવામાં આવ્યો હતો. પોલીસની હાજરીથી કેન્દ્ર પર શાંતિપૂર્ણ માહોલ જળવાઈ રહ્યો હતો.આ રીતે સમી શહેરમાં ધોરણ-10 બોર્ડ પરીક્ષાનો પ્રારંભ ઉત્સાહ, શિસ્ત અને સુચારુ આયોજન સાથે થયો હતો, જે વિદ્યાર્થીઓ માટે યાદગાર ક્ષણ બની રહ્યો છે
રિપોર્ટ: અનિલ રામાનુજ રાધનપુર, પાટણ
