રાધનપુર તાલુકાના અરજણસર ગામની કેન્દ્ર શાળાની વિદ્યાર્થિનીએ રાજ્ય કક્ષાએ મેળવ્યો પ્રથમ ક્રમાંક
કેપિટલ મેસેજ, ન્યુઝ
રાધનપુર તાલુકાના અરજણસર ગામ માટે ગૌરવની ક્ષણ સર્જાઈ છે. શિક્ષણ વિભાગ તથા જીસીઇઆરટી ગાંધીનગર દ્વારા આયોજિત ‘નિપુણ ભારત મિશન’ અંતર્ગત યોજાયેલી રાજ્ય કક્ષાની વાર્તા નિર્માણ સ્પર્ધામાં અરજણસર પગાર કેન્દ્ર શાળાની વિદ્યાર્થિની ઠાકોર સેજલબેન અમરતભાઈએ રાજ્યમાં પ્રથમ ક્રમાંક મેળવી નોંધપાત્ર સિદ્ધિ હાંસલ કરી છે.
આ સ્પર્ધામાં સમગ્ર રાજ્યમાંથી વિદ્યાર્થીઓએ ભાગ લીધો હતો, જેમાં સેજલબેને પોતાની સર્જનાત્મકતા, અભિવ્યક્તિ અને લેખન કૌશલ્યના આધારે પ્રથમ સ્થાન મેળવી સૌનું ધ્યાન આકર્ષ્યું છે. ગરીબ અને સામાન્ય પરિવારથી આવતી આ દીકરીએ મર્યાદિત સંસાધનો વચ્ચે મહેનત અને લગનથી આ સિદ્ધિ મેળવી છે, જે અન્ય વિદ્યાર્થીઓ માટે પ્રેરણારૂપ બની છે.
More Read
સેજલબેનને આ સિદ્ધિ બદલ ટ્રોફી તથા રોકડ પુરસ્કારથી સન્માનિત કરવામાં આવી હતી. તેમની આ સફળતા પાછળ માર્ગદર્શક શિક્ષક જયંતીલાલ ઠાકોર તથા શાળાના આચાર્ય અમૃતભાઈ ચૌધરીનો મહત્વનો ફાળો રહ્યો હોવાનું જણાવાયું છે.
આ સિદ્ધિ બદલ અરજણસર ગામ, શાળા પરિવાર તેમજ ગ્રામજનોમાં આનંદ અને ગર્વની લાગણી પ્રસરી ગઈ છે. સ્થાનિક લોકો દ્વારા સેજલબેનને અભિનંદન પાઠવી તેમના ઉજ્જવળ ભવિષ્ય માટે શુભેચ્છાઓ આપવામાં આવી રહી છે.
રિપોર્ટ. અનિલ રામાનુજ રાધનપુર, પાટણ
